Güclü cinsin zəifliyi

Güclü cinsin zəifliyi

Adi : Güclü cinsin zəifliyi
Hekaye: Kişilər qadınlardan daha sürətlə qocalır
və onların orta ömür müddəti də zərif
cinsdən azdır.
Postsovet məkanı ölkələrində aparılan
araşdırmalara görə, bu məkanda 60 yaşlı
kişilərin orqanizmi özünün bioloji
yaşından 5-6 il yaşlıdır.
Orqanizmin belə "köhnəlməsi", haldan
düşməsi bununla izah edilir ki, kişilər
özlərini qorumağa adət etməyiblər, öz
səhhətlərinin qayğısına az qalırlar və pis
vərdişlərə tez aludə olurdar: spirtli içki
içməyi, ləzzətli yeməyi sevir, tüstülədir
və yaşlandıqca divandan əl çəkmirlər.
Bəzilərimiz fitnes-klubların üzvü olsaq
da, ora ayda-ildə bir neçə dəfə baş
çəkərik, ya da buna macal tapmarıq.
Yaş və riskləri
Çox maraqlı və qəribədir ki, güclü cinsin
sağlamlığını qorumasına testosteron
mane olur - o hormon ki, kişini kişi edir.
Məhz testosteron hormonu güclü cinsin
psixoloji özəllik və davranışlarını
müəyyənləşdirir. Kişilər səhhətlərindən
şikayətlənməyi zəifliyin etiraf kimi qəbul
edirlər. Odur ki, onlar poliklinikaya son
həddə - səhhətləri tamamilə pozulduqda
üz tuturlar. Səhhəti təhdid edən risklərsə
kişiləri hər yaşda, hətta gənclikdə belə
qarabaqara izləyir. Bundan onların
yanında olan qadınlar - ana, bacı və
həyat yoldaşı mütləq xəbərdar olmalıdır.
Axı öz ana missiyası ilə sağlamlığa
qayğı ailənin rifahının keşiyində duran
qadının təbiətindədir. Təsadüfi deyil ki,
ailəli kişilər subaylarla müqayisədə daha
sağlam olur və daha çox yaşayırlar
("AiF.Zdorovye" həftəliyi).
20+
20 yaşlarında kişilərdə belə hiss olur ki,
həyat sonsuz və sağlamlıq tükənməzdir -
odur ki, sonrasını düşünmədən
səğlamlıqlarını bədxərcliklə xərcləyirlər.
Aktiv kişi həyatının birinci onilliyi
müxtəlif travmalar, xroniki az yatmaq,
qüvvəni tükədəcək qədər işləməklə
müşayiət edilir - gənclik və orqanizmin
resurslarını hələ sərf edib tükətməməsi
ilə bağlı bir qayda olaraq bu fəallıq elə
bir problemli nəticələr olmadan ötüşür.
40+
40 yaşı keçdikdən sonra kişilərdə orta
yaşın böhranı başlayır. Bu fonda baş
qaldıran depressiyanı bəzi kişilər
alkoqolla "müalicə" etməyə çalışır.
Təsadüfi deyil ki, güclü cins alkoqolu ən
yaxşı antidepressant sayır. Doyuncadan
artıq yemək və divana yapışıb qalmaq
güclü cinsin zəifləməsinin başlanğıcını
qoyur: qaraciyər piylənir və onun ardınca
metabolik sindrom peyda olur.
Metabolik pozuntulardan cürbəcür
xəstəliklər fəvvarə vurur: 2-ci tip şəkərli
diabet, ürək-damar problemləri,
hipertoniya, erektil disfunksiya,
uğursuzluq kompleksinin yaratdığı
psixoloji pressinq və s.
Məsələn, hipertoniya xəstəliyi adətən elə
də ağır keçmədiyi üçün onu müalicə
etməyə meyl edilmir. Lakin ardınca ağır
fəsadlar gəlir. Odur ki, məhz 40 yaşı
haqladıqda kişilərin ilk ciddi
dispanserləşməyə ehtiyacları var.
Sağlamlıqları ilə bağlı ciddi
profilaktikaya başlamaları üçün onları
buna təşviq etmək, başa salmaq lazımdır
ki, səhhətə diqqət yetirməmək ağır
nəticələrə aparır.
60+
60 yaşından sonra metabolik və damar
risklərinin reallaşması dövrü başlayır.
Fiziki və emosional qüvvənin
çatışmaması aşkar hiss olunur. Bunu
xüsusilə şəhərlərdə yaşayanlar hiss
edirlər.
Bu yaşlardan artıq ürək titrəməyə
başlayır, hipertoniya peyda olur, bəzi
kişilər bu yaşa artıq bir infarkt
keçirməklə çatır, bəzilərisə heç çatmır...
60 yaşı görə bilmirlər.
Bu yaşların daha çox rast gəlinən
diaqnozları: diabet, podaqra, ağciyərlərin
xroniki xəstəlikləri, prostat vəzi problemi,
piylənmə, hipodinamiya və s. saydıqca
bitməyən azarlar.
Həkimə getməyib alternativ yollarla
müalicə olunmağa çalışmaq səhhət
problemlərini daha da qəlizləşdirir.
Nəticədə güclü cinsin çox sayda
təmsilçisi koronar sindromdan və ya
miokard infarktından bu fani dünyaya
"əlvida" deyir.
Çıxış yolu
Qocalmanı modifikasiya edə biləcək
faktorlar var. Yəni elə etmək olar ki, kişi
genetik yaşınadək və ya ona yaxın bir
müddətədək yaşasın.
Qeyd edək ki, hər birimizin genlərində
kodlaşdırılmış yaş müddəti var. Lakin biz
həyatımız boyu orqanizmimizə qəsd
edərək sanki özümüzü vaxtından əvvəl
"öldürməklə" məşğuluq.
Oğlanları uşaqlıqdan səhhətlərinə diqqətli
olmasına çalışmaq lazımdır - o yaşda ki,
oğlan uşağının orqanizmində testosteron
elə də çox deyil və hələ anasının sözünə
qulaq asır.
Bundan başqa, urbanistik zəmanədə ən
mühümü şəhərin həyatımıza gətirdiyi
risk faktorlarından (hipodinamiya, qeyri-
düzgün qidalanma, havanın çirklənməsi
kimi problemlər və s.) yaxa qurtarmaq
yolunu tapmaqdır. Hava çirklidirsə,
bundan ilk növbədə bizim qanımızı toksik
maddələrdən təmizləyən qaraciyər
əziyyət çəkir.
Sağlamlığı bərpa etmək üçün bir sıra
proqramlar və onlara əməl etmək ələ də
çətin məsələ deyil:
* Qidanın kalorisi sutkada 1700-2000
kkal aşağı salınır;
* Yağ istehlakı sutkada 10-20 qrama
salınır;
* Rafinə edilən, karbohidratlarla bol olan
və tez həzm edilən qidalardan imtina
edilir;
* Hər gün ən azı 500 qram meyvə və
tərəvəz yeyilir;
* İmkan olduqca çox hərəkət etmək
lazımdır;
* Alkoqoldan imtina edin;
* E vitamini, statinlər, kalsium
preparatları, yarımvitaminlər qəbul edin;
* Omeqa-3 yağ turşusu və essensial
fosfolipidlərlə bol olan nutrisevtiklər çox
faydalıdır.
Sonuncu qaraciyərin bərpasına müsbət
təsir göstərir, bir şərtlə ki, rasionun
kaloriliyi aşağı olsun.
Qeyd edək ki, bu proqramla tam və
ardıcıl müalicə olunsanız, effektini
görəcəksiniz. Bu müalicə ən azı 3 ay
davam etməlidir, çünki azarların özləri
də yavaş-yavaş gəlir və uzun müddət əl
çəkmir.

Elave olunub: 06.07.2015 - (16:39)
Oxunub: 1403 defe
Bolme: +18 Melumatlar